مقالات

مجموعة من المقالات التي تتناول أهم الموضوعات المتعلقة بالصحة الجنسية

شائعات وخرافات ليلة الزواج الأولي

كل بنت متجوزة جديد أو داخلة على جواز بيكون بالها مشغول بحاجات كتير، منها العلاقة الحميمية وممارستها ودي من الحاجات اللي بتشغل البال كتير وبتكون أحيانًا مصدر خوف وقلق لأن بشكل عام الثقافة الجنسية مش موجودة بشكلها الصح ومصادر المعلومات الصح والموثوقة فيها بتكون قليلة بشكل عام. في المقابل مصادر المعلومات المغلوطة والغير دقيقة منتشرة بشكل كبير للأسف وبتنتشر كتير خصوصًا بين الأصدقاء وجوه العائلة.

خلينا نتفق في البداية ان جزء كبير من تجربة العلاقة الحميمية الأولى هو اللي بيكون انطباعك الدائم عنها، وبالتالي لو معلوماتك مغلوطة أو مش صحيحة بالقدر الكافي ده هيخلي التجربة دي أصعب وممكن يأخر استمتاعك بيها، في حين ان لو معاكي المعلومة الصح هتقدري تعدي المخاوف دي كلها وتستمتعي بعلاقة صحية من البداية

كل بنت متجوزة جديد أو داخلة على جواز بيكون بالها مشغول بحاجات كتير، منها العلاقة الحميمية وممارستها ودي من الحاجات اللي بتشغل البال كتير وبتكون أحيانًا مصدر خوف وقلق لأن بشكل عام الثقافة الجنسية مش موجودة بشكلها الصح ومصادر المعلومات الصح والموثوقة فيها بتكون قليلة بشكل عام. في المقابل مصادر المعلومات المغلوطة والغير دقيقة منتشرة بشكل كبير للأسف وبتنتشر كتير خصوصًا بين الأصدقاء وجوه العائلة.

خلينا نتفق في البداية ان جزء كبير من تجربة العلاقة الحميمية الأولى هو اللي بيكون انطباعك الدائم عنها، وبالتالي لو معلوماتك مغلوطة أو مش صحيحة بالقدر الكافي ده هيخلي التجربة دي أصعب وممكن يأخر استمتاعك بيها، في حين ان لو معاكي المعلومة الصح هتقدري تعدي المخاوف دي كلها وتستمتعي بعلاقة صحية من البداية.

في المقالة دي جمعنا ليكي 5 خرافات ومعلومات غير صحيحة عن العلاقة الحميمية وإيه تصحيحها ?

الخرافة الأولى: فقدان العذرية معناه تمزق غشاء البكارة ونزيف
من أشهر الخرافات المنتشرة المتعلقة بفقدان العذرية انه لازم يصاحبه تمزق في غشاء البكارة وبالتالي بيحصل نزيف معاه، ودي من الحاجات اللي ممكن تخوف أي بنت من العلاقة الحميمية، بس الحقيقة غير كده، لأن غشاء البكارة بيختلف شكله وطبيعته من بنت للتانية، وبالتالي عدد كبير من النساء والبنات مبيتعرضوش لأي تمزق في غشاء البكارة وقت العلاقة الحميمية لأن ممكن الغشاء يكون مرن ويحصله تمدد ودي طبيعة موجودة عند البعض.
كمان حابين نوضح ان بعض الرياضات ممكن تسبب تمزق بسيط في غشاء البكارة، الموضوع مبيكونش مرتبط بس بالممارسة الجنسية.

الخرافة الثانية: لازم تخبي خوفك وتوترك من الليلة الأولى
بنات كتير بيسمعوا من صاحباتهم عن تجاربهم في أول ليلة جواز، ومن القصص اللي بتتقال كتير في الموضوع ده ان البنت مبتحسش بالتوتر، ولو حست بيه لازم تخبيه ومتبينش الشعور ده. خلينا نتفق في الأول ان شعور البنت بالتوتر ده حاجة طبيعية جدًا ومفيش منها أي ضرر طالما بتقدر تتعامل مع التوتر ده بشكل كويس ومتخليهوش يسيطر عليكي. النقطة الثانية ان غالبًا شريك حياتك بيشاركك نفس التوتر والمخاوف، عشان كده أهم شيء في العلاقة عشان نتعامل مع التوتر هو التواصل مع شريكك بكل صراحة وبساطة ومتتحامليش على نفسك لأن في الآخر العلاقة بتكون مبنية على المتعة المتبادلة من الطرفين مش من طرف واحد.
ولو حسيتي ان لسه التوتر عائق في طريقك للاستمتاع استخدمي فيروزا جل اللي هيساعدك في عملية استرخاء المهبل وهيسهل عليكي صعوبة الليلة الأولى.

الخرافة الثالثة: توقعك انك هتوصلي للنشوة في كل مرة
والخرافة دي منتشرة برضه نتيجة ضعف الثقافة الجنسية والاعتماد على سماع تجارب شخصية مش بتناسب الكل، انك في كل مرة أثناء العلاقة الحميمة هتوصلي لقمة الاستمتاع والنشوة وممكن كمان أكتر من مرة خلال العلاقة الواحدة، وده في الحقيقة توقع ممكن يصيبك بنوع من الإحباط والإحساس بالفشل وممكن توصل للوم شريكك لو ده محصلش. في الحقيقة النسبة الأكبر من البنات والنساء مبيقدروش يوصلوا للنشوة من خلال العلاقة الحميمة وبس، ده العامل الأساسي في الوصول ليها بيكون المداعبة، وكمان فيه عوامل تانية ممكن تؤثر على وصولك ليها وبتختلف من شخص للتاني ومن وقت للتاني كمان زي شعورك بالتوتر أو الراحة وقتها، ومعرفتك لنفسك ولجسمك، وكمان طريقة تواصلك مع شريكك وقابليتك انك توصليله ده، كل العوامل دي بتؤثر في وصولك للنشوة أو لأ ودة غير عوامل أخري كتيير هنتكلم عنها في مقال منفصل.

الخرافة الرابعة: العلاقة الحميمة تدوم لساعات طويلة
من الخرافات المعتادة والمنتشرة هي الاعتقاد ان العلاقة الحميمة بتدوم لساعات طويلة طوال الليل مثلًا، وده اعتقاد خاطئ لأن حسب دراسات علمية، مدة الانتصاب عند أغلب الرجال بتكون ما بين 4 دقائق و 11 دقيقة، وبالتالي العلاقة مش بتتوقف على الممارسة بس لكن التجهيز ليها والمداعبة وغيرهم بيكون ليهم تأثير كبير غير فترة الممارسة نفسها.

الخرافة الخامسة: الحمل مبيحصلش في الليلة الأولى
دي الخرافة الأخيرة في المقال، وده اعتقاد خاطئ منتشر بشكل كبير، الحمل مش متعلق بالليلة الأولى أو الثانية أو الخمسين، احتمال الحمل موجود دائمًا طول ما فيه علاقة حميمة. الطريقة الوحيدة لتجنب الحمل هى عن طريق استخدام واحدة من وسائل منع الحمل المختلفة وفي الحالة دي بننصحك بزيارة طبيبك قبل بالفرح عشان تناقشي معاه الوسائل الموجودة وينصحك بالطريقة الأفضل والمناسبة ليكي.

دي كانت أكتر 5 خرافات منتشرة عن طبيعة العلاقة الحميمة في الليلة الأولى للزواج والحقيقة العلمية المظبوطة لكل خرافة منهم.